ஐ.சி.சி. டெஸ்ட் தரவரிசை பட்டியலில் தெண்டுல்கர், காலிஸ் முதலிடம்

துபாய், ஜன.8- 

ஐ.சி.சி. டெஸ்ட் பேட்டிங் தரவரிசை பட்டியலில் இந்திய நட்சத்திர வீரர் சச்சின் தெண்டுல்கர், தென் ஆப்பிரிக்க வீரர் காலிஸ் கூட்டாக முதலிடம் பிடித்துள்ளனர். இருவரும் இந்தியா-தென் ஆப்பிரிக்கா இடையேயான டெஸ்ட் தொடரில் சிறப்பாக விளையாடியது குறிப்பிடத்தக்கது.

 

தர வரிசையில் முதலிடத்தில் இருந்த இலங்கை வீரர் சங்கக்கரா 2 இடங்கள் பின்னுக்கு தள்ளப்பட்டு 3-வது இடத்தில் உள்ளார். சேவாக் 2 இடங்கள் பின்னுக்கு தள்ளப்பட்டு 6-வது இடத்தில் உள்ளார். லட்சுமண் தொடர்ந்து 9-வது இடத்தில் உள்ளார். காம்பீர் 15-வது இடத்தில் இருக்கிறார். பந்து வீச்சு தரவரிசை பட்டியலில் தென் ஆப்பிரிக்க வீரர் ஸ்டெயின் தொடர்ந்து முதலிடத்தில் உள்ளார். இந்திய வீரர்கள் ஜாகீர்கான் 5-வது இடத்திலும் ஹர்பஜன் சிங் 8-வது இடத்திலும் உள்ளனர்.